رواية ورد الجبل الفصل السادس 6 بقلم نسمة مالك

التي تحتوي على عبق رائحته إلى أن يحين موعد استيقاظ صغارها ..
دفنت وجهها في معطفه و قد خانتها دموع كعادتها و تساقطت من عينيها بللت ثيابه و بهمس متلهف قالت.. 
ربنا يرجعك لينا بألف سلامة يا أيوب.. ربنا يجمعنا على خير يارب يا حبيبي و يلم شملنا من تاني .. 
تركت ثيابه على مضض و تحاملت على نفسها و نهضت من الفراش بضعف سارت تجاه حمام الغرفة و اختفت بداخله لدقائق و خرجت ارتدت روبها بحرص حتى لا تألمها تلك الإبرة الطبية المنغرزة بكف يدها قام جبل بتركيبها لها لتأخد علاجها عن طريقها..
أخذت نفس عميق و رسمت إبتسامة على وجهها قبل أن تفتح باب غرفتها و خرجت لردهة المنزل لتجد زينب حماتها تجلس بمقعدها المعتاد أمام شاشة التلفزيون تتابع إحدي البرامج الدينيه.. 

صباح الخير يا ماما زينب..
يا صباح الرضا و السرور يا بنتي.. نطقت بها زينب بابتسامتها البشوشة و هي تنهض من مكانها و تهرول مسرعة تجاهها لتساندها أثناء سيرها.. 
أيه اللي صحاكي بدري أوي كده يا بنتي.. كنتي خليكي مرتاحة و اطمني أنا جهزت الفطار و حضرت أكل الحضانة بتاع ولادك و كنت هصحيهم في معادهم و البسهم و أوديهم كمان..
ربتت حبيبة على يدها بلطف و تحدثت بامتنان قائلة.. مرضتش أتعبك أكتر من كده يا ماما.. أنا تعبي طول أوي في الحمل ده و تقلت عليكي بما فيه الكفاية ..
شهقت زينب بخفوت و رمقتها بنظرة عاتب و هي تقول.. ده كلام تقوليه يا حبيبة! أنتي كده هتزعليني منك ده أنتي الغالية مرات أبني الغالي و زي بنتي.. تعرفي أنا لو كان عندي بنت مكنتش هحبها قدك ..
ابتسمت لها حبيبة وهمست بصوت اختنق بالبكاء قائلة.. 
أنا كمان بحبك أوي والله.. ربنا ميحرمنيش منك أبدا يا ماما زينب ..
أردفت زينب بتنهيدة حزينة على حالها.. 
و لا يحرمني منكم يا بنتي و يرجع لك جوزك سالم غانم مجبور الخاطر ..
بكت حبيبة بنحيب و هي تقول بنبرة راجية.. 
أيوة أدعي لنا من قلبك و أدعي ل أيوب بالذات ربنا يستر طريقه و يحفظه و يرجع لي في أقرب وقت عشان واحشني أوي أوي ..
بكائها هذا أغضب زينب كثيرا فابعدتها عنها برفق حتى تستطيع النظر لها و تحدثت بلهجة حادة لكن هادئة قائلة..
قولي لجوزك يا حبيبة.. جوزك وحشك و عايزاه يرجع لك و مش قادرة على بعده عنك يبقي العقل بيقول تكلميه و تصارحيه بلي في قلبك يا بنتي بدل ما أنتي تعبانه في غيابه و عماله تدبلي و تنطفي يوم عن يوم.. كلميه و خليه يرجع ليكي و لبيته و لعياله يا إما ياخدكم معاه هناك.. المهم متتفرقوش عن بعض كده يابنتي ..
ياخدنا معاه إزاي بس يا ماما.. مينفعش نسيبك لوحدك ..
تضاعف ڠضب زينب أكثر و صاحت بانفعال قائلة.. 
هو أيه اللي مينفعش تسبوني لوحدي! عفريت هياكلني مثلا! متحملوش همي و لا تشيلوني ذنب تفريقكم عن بعض يا بنتي أنا خلاص خفيت الحمد لله و قلبي بقي زي الحديد بعد العملية و رجع أقوى من الأول..
ظهر الأسف على وجه حبيبة و هي تقول.. الموضوع مش سهل يا ماما.. إحنا في عز الحر و سفري لأسوان دلوقتي بالولاد و أنا حامل و طبعا مش هنسيبك و هناخدك معانا هيبقي صعب أوي علينا كلنا خصوصا انتي يا حبيبتي.. و بعدين أيوب عنده شغل مهم أوي هناك لازم يركز فيه