رواية لحظات من الصدمة (كاملة حتي الفصل الاخير) بقلم عمرو راشد

اتنسيت من حياتها
بإيدك تكمل وهي مش فاكراك وبرضو بإيدك ترجعها حياتك تاني
طب انا هفرض نفسي عليها ازاي
أولا لازم نعرف تفاصيل حياه كل واحد من اللي في الصورة دول لازم نعرف عنهم كل حاجة عشان نبدأ ننفذ خطتنا
وهنجيب معلوماتهم منين
من الجامعة
بس انا مش هعرف اعمل كدا
ملكش دعوة انا هتصرف بكرا الصبح كل حاجة هتكون عندك
بعدها نزل وانا نمت مكاني على الكنبة بفتكر في كل لحظة عدت بينا كل الوعود اللي انا وعدتها بيها ومعرفتش انفذها انا خذلتها
فلاش باك
كنت فين لما دخلت عليك الاوضة امبارح ولقيتك نايم
ايه السؤال مش فاهم
متستعبطش يا وليد قولي كنت فين
كنت بصور ورق تخيلي الورقة بقت ب جنيه
امممم بتحاول تهرب
اهرب من ايه
الحقيقة ليه مش عايز تعترف بالحقيقة
وأنتي ليه مش عايزة تعترفي ان تمثيلك مبالغ فيه
ايه دا يعني معجبكش
محتاجة تظبطي الاداء شوية
فعلا انا لازم اتدرب اكتر من كدا
ملك هو انتي امتى هتقتنعي انك ملكيش اي علاقة بالافلام وانتي اساسا ولا ممثلة ولا خريجة فنون جميلة حتى
ما قولتلك يا وليد أنا بحب التمثيل من وانا صغيرة بس بابا..
بابا رفض وقالي معهد تمثيل ايه يا قليلة الادب ادخلي جوا حافظ الكلام دا وانتي قولتيه مليون مرة
تقصد ايه تقصد انك زهقت مني
انا مبعرفش ازهق منك يا ملوكة انا كل يوم بشوفك فيه كأني بشوفك لاول مرة و سبحان الله بقع في حبك كل مرة
هو انا مش عارفة ااخد موقف ليه
عشان بحبك
باااك
كل ذكرى عيشناها سوا كانت بتمر عليا مكنتش عارف اتخيل البيت وهي مش فيه مش عارف ادخل الاوضة ولا اشوفها حتى خاېف عليها جدا ومش قابل فكرة انها بعيدة عني وبسبب القلق دا فضلت صاحي ل تاني يوم مكنش جايلي نوم نهائي لحد ما سمعت جرس الباب بيرن الساعة 10 الصبح قومت فتحت الباب لقيته الدكتور
انت لسة نايم
انا منمتش اصلا
طب هتعمل شاي ولا نتكلم علطول
نتكلم علطول عشان الوقت بيروح مننا
انا لسة جاي من الجامعة و جيبتلك كل المعلومات اللي انت عايزها انت تعرف الواد اللي كان معاها امبارح اسمه ايه
تقريبا قالت انه اسمه شادي
اهو موجود معايا اسمه شادي محمد عبدالسلام بلوجر مشهور
اقسم بالله ولا اعرفه
المهم اننا لازم نخليه يبعد عنها
ازاي
طالما الواد دا مشهور يبقا اكيد يهمه ان صورته تكون كويسة
و بعدين
احنا هنبعتله واحدة ونصوره معاها ونخليه يختار يإما يبعد عن ملك او ننشر احنا الصور
انت متأكد من اللي هنعمله دا
متأكد طبعا بس هي الفكرة ان لازم مراته متعرفش حاجة
استنى بس هو متجوز
ايوا متجوز
طب ماهي سهلة اهي يا سامح احنا نستنى لحد ما يكون مع ملك ونكون احنا متفقين مع مراته وتيجي تقفشه وبكدا يبعد عن ملك خالص
فكرة حلوة دي برضو
بالفعل سامح بعدها عرف يجيب رقم مرات شادي واستنيت لحد ما شادي يقابل ملك مرة تانية وطبعا عرفت مكانهم من اشارات تحديد المكان اللي جاتلي من جهاز التتبع اللي في عربية ملك بعدها روحنا انا وسامح ووقفنا قدام المطعم اللي كانو قاعدين فيه وطبعا كنا بلغنا مراته من قبل ما نتحرك وفعلا بعدها ب ساعة مراته وصلت وشوفناها وهي داخلة المطعم وعملت الڤضيحة اللي كنا عايزينها بالظبط وبعد دقايق خرجت وطبعا هو كان معاها سامح بعدها بص ليا وقالي
دي فرصتك يا وليد عارف هتقول ايه
عارف متقلقش
طب يلا